သူငယ်ချင်းတို့ဘာဝ ငယ်စဉ်က သိကျွမ်းရာတွင် အတွင်းအပြင် အဆိုးအကောင်းကို သိရှိခဲ့ကြလေ သည်။ ကြီးမှတွေ့ကြုံရသူတို့မှာ ငယ်စဉ်က အဆိုးအကောင်းကို မသိရှိကြရပေ။ ထို့ကြောင့် ငယ်စဉ်က အတွင်း သိအခင်းသိအနေဖြင့် သိရှိခဲ့သော ချွတ်ယွင်းမှုအပြစ်တို့ကို ဖော်ထုတ်ပြောဆိုသောအခါ၊ အ၀တ်အစား မလုံ မလဲ ကလေးဘ၀က သိမြင်ထားသော ခြေလက်အတွင်းအင်္ဂါ ကျိုးဆွံ့ခိုက်နာမှုများကို ထုတ်ဖော်ပြောဆို၍ အရှက်ခွဲသည့်သဘောဖြင့် တင်စားပြောဆိုကြသည်။

            မာလကာ၊ သြဇာ၊ သရက်စသော သစ်သီးပင်တို့ကို စိုက်ပျိုးသောအခါ အပင်ကြီးရင့်၍ ပထမဦး အသီး သီးသည့်နှစ်တွင် အသီးများပြားစွာ မသီးသေးဘဲ ကျေးငှက်များသိ၍ လာရောက်စားသောက်ရရုံ ငှက်အစာ အတွက် နှိုးဆော်ရုံသဘောဖြင့် အသီးဦးအနည်းငယ် သီးလေ့ရှိလေသည်။ ထိုသို့ သီးပင်အရွယ်ရောက်၍ သီးစပြုခြင်းကို ငှက်စာဆော်ပြီဟု ဆိုစမှတ်ပြုကြရာ၊ မိန်းကလေးငယ်များသည် အိမ်ထောင်နိုင်သော အရွယ် သို့ လှမ်းဝင်ဦးမည်ဖြစ်သည့် ဓမ္မတာပေါ်စ အပျိုဖျန်း အရွယ်ရောက်ဝင်သည်ကို တင်စား၍ အပျိုပိုင်းဝင်သည်၊ အပျိုဖော်ဝင်သည်၊ ငှက်စာဆော်သည်ဟု သုံးစွဲကြသည်။

            ငါးများသည် အချိန်အခါအလိုက် ဖို,မ မိတ်လိုက်ကြ၍ အစအအုပ်လိုက် လူးလာလုံးထွေး ကူးခတ်ကြ သည်ကို ငါးရစ်တက်သည်ဟု ဆိုသည်။ ထိုသဘောကို တင်စား၍ သူနှစ်ဦးသည် အထူးရင်းနှီးရောဝင်လျက် သင့်မြတ်ကျီစယ်နေသောအခါတွင် ခိုင်းနှိုင်းပြောဆိုလေ့ရှိသည်။

        အသက်အရွယ် ကြီးလာသောသူများသည် မိမိတို့အသက်အရွယ်နှင့် ထိုက်လျော်စွာ ပြုမူကျင့်ကြံ နေထိုင်ခြင်းမပြုဘဲ၊ အသက်အရွယ် ငယ်စဉ်က အမူအရာမျိုးကိုပင် ပြန်လည်လိုက်စားခြင်းကို ဆိုသည်။ အတိတ်၏ သဘောအမူကို ပြန်လည်ခံယူ ကျင့်ဆောင်သော နေရာတိုင်းတွင်လည်း တင်စား၍ သုံးနှုံးသည်။ အထူးသဖြင့် စက်ဆုတ်သရော်သောအားဖြင့် ပြစ်တင်ပြောဆိုသော စကားသာဖြစ်သည်။